Վերադառնալ
12.05.2022

Ավարտվեց «Երկխոսության ոստիկանություն» թեմայով երկշաբաթյա վերապատրաստման դասընթացը

Ավարտվեց «Երկխոսության ոստիկանություն» թեմայով երկշաբաթյա վերապատրաստման դասընթացը

    Մայիսի 12-ին ամփոփվեց «Երկխոսության ոստիկանություն» թեմայով երկշաբաթյա վերապատրաստման դասընթացը:  ԵԱՀԿ քարտուղարության աջակցությամբ կազմակերպված դասընթացին մասնակցեցին ՀՀ ոստիկանության տարբեր ստորաբաժանումների  ծառայողներ: Դասընթացի ընթացքում ՀՀ ոստիկանության ներկայացուցիչները ծանոթացան քաղաքացիների հետ երկխոսելու շվեդական փորձին, մասնավորապես՝ դրանք արդյունավետ կիրառելու տեխնիկային, մեթոդներին ու պրակտիկ իրավիճակների լուծումներին:

  Ամփոփմանը ներկա էին ՀՀ ոստիկանության շտաբի պետ, ոստիկանության գնդապետ Արմեն Մկրտչյանը, Կրթահամալիրի պետ, ոստիկանության գնդապետ Մ. Մուրադյանը, Շտաբի միջազգային համագործակցության վարչության պետի տեղակալ, ոստիկանության գնդապետ Արմեն Սեդրակյանը, ՀՀ-ում Շվեդիայի Թագավորության դեսպանության փոխդեսպան, խորհրդական Անիկա Նորդին Ջայավարդենան, ԵԱՀԿ ծրագրերի ազգային համակարգող Ռուզաննա Բաղդասարյանը և փորձագետ-դասընթացավարներ  Կարլ Յոհան Ահլստրոմն ու Տանյա Վիկլունդը:

  ՀՀ ոստիկանության շտաբի պետ, ոստիկանության գնդապետ Արմեն Մկրտչյանը շնորհակալություն հայտնեց դասընթացի կազմակերպիչներին և մասնակիցներին՝ նշելով, որ այս միջոցառումն առանցքային ու կարևոր նշանակություն ունի ոստիկանության համար, քանի որ օգնում է մասնագիտական գործառույթներն իրականացնել է՛լ ավելի բարձր արդյունավետությամբ: Ապագայում, ըստ շտաբի պետի, նախատեսվում է ՀՀ ոստիկանության կազմում ունենալ տվյալ ոլորտին առնչվող ստորաբաժանում, իսկ դասընթացի ընթացքում ձեռք բերված գիտելիքները, հմտություններն ու կարողություններն օգտակար կլինեն դրանում:

  ՀՀ-ում Շվեդիայի Թագավորության դեսպանության փոխդեսպան, խորհրդական Անիկա Նորդին Ջայավարդենան շնորհավորելով դասընթացի կազմակերպիչներին ու մասնակիցներին նման արդյունավետ աշխատանք կատարելու համար, ոստիկանության հետ համագործակցությունը շարունակելու պատրաստակամություն հայտնեց:

  Դասընթացավարներից Կարլ Յոհան Ահլստրոմն էլ ընդգծեց, որ քննարկումները բավական հետաքրքիր էին և արդյունավետ: Նա նաև շնորհակալություն հայտնեց ՀՀ ոստիկանությանն ու Կրթահամալիրին՝ դասընթացն այսչափ բարձրորակ  կազմակերպելու համար:

  Շնորհակալական խոսքով հանդես եկավ նաև ԵԱՀԿ ծրագրերի ազգային համակարգող Ռուզաննա Բաղդասարյանը:

  Հանդիպման ավարտին դասընթացի մասնակիցները հանդիսավոր կերպով ստացան իրենց հավաստագրերը: