Սիրելի՛ ուսանողներ,
Սրտանց շնորհավորում եմ ձեզ խորհրդանշական տոնի՝ Ուսանողների միջազգային համերաշխության օրվա առթիվ:Պատահական չէ, որ ուսանողների միջազգային օրվան միանում է «համերաշխություն» բառը։ Առանց համերաշխության չկա առողջ և մարտունակ միտք, իսկ առանց առողջ բանականության՝ գիտակից և խելացի հասարակություն։
Ուսանողը յուրաքանչյուր պետության զարգացման վաղվա երաշխավորն է, պետության հենասյունը, ներկան ու ապագան, իսկ երկրի հուսալի ապագայի ամենակարևոր գրավականը բանիմաց, կիրթ ու բարձր արժեքներ կրող երիտասարդն է: Օրեցօր առաջընթաց ապրող աշխարհում միայն ամուր գիտելիքներով ու կրթական բարձր մակարդակով անհատը կարող է դիմակայել իր առջև ծառացած մարտահրավերներին:
Առանձնակի ջերմությամբ շնորհավորում եմ ՀՀ ոստիկանության կրթահամալիրի ուսանողներին՝ մեր երկրի ապագա ոստիկաններին, իրավաբաններին, և վերջապես, ՀՀ քաղաքացու իրավունքներն ու շահերը պաշտպանող «օրենքի մարդուն»։ Համոզված եմ, որ ձեր ապագա գործունեությունը հիմնված է լինելու բարձր արժեքների, ազնիվ նպատակների, լավատեսության և վեհ գաղափարների վրա:
Հայաստանի Հանրապետության սիրելի՛ ուսանողներ, ևս մեկ անգամ ջերմագին շնորհավորելով, մաղթում եմ ձեր համարձակ նպատակները կյանքի կոչելու, մասնագիտական նորանոր բարձունքները հաղթահարելու, երազանքները վստահ իրականացնելու կամք ու եռանդ՝ ի շահ մեր պետության և ապագայի:
ՀՀ ոստիկանության կրթահամալիրի պետ,
ոստիկանության գնդապետ Մ․ Մուրադյան