Ս․թ․ ապրիլի 20-ից 23-ը ներառյալ ՀՀ ՆԳՆ կրթահամալիրում անցկացվեց «Միգրանտների ապօրինի տեղափոխում» թեմայով չորսօրյա վերապատրաստման դասընթացը, որը նպատակ ուներ զարգացնել իրավապահ մարմինների մասնագիտական կարողությունները և ամրապնդել միջգերատեսչական համագործակցությունը տվյալ ոլորտում։

   Դասընթացը կազմակերպվել էր ԵՄ իրավապահ մարմինների վերապատրաստման գործակալության (CEPOL) աջակցությամբ, և այն իրականացրեցին CEPOL-ի կողմից վերապատրաստված և հավատարմագրված դասավանդողներ՝ Ծովակ Մնացականյանը (ՀՀ գլխավոր դատախազություն), Արթուր Մելիքյանը (ՀՀ քննչական կոմիտե), Արամ Մելքոնյանը (ՀՀ ՆԳՆ միգրացիայի և քաղաքացիության ծառայություն) և Ռուզաննա Բադալյանը (ՀՀ ՆԳՆ ոստիկանության քրեական ոստիկանության գլխավոր վարչություն)։

   Դասընթացին մասնակցում էին ՀՀ իրավապահ մարմինների 20-ից ավել ներկայացուցիչներ՝ ապահովելով փորձի փոխանակում, գիտելիքների ընդլայնում և արդյունավետ համագործակցության հարթակի ձևավորում։ Մասնակիցների ակտիվ ներգրավվածությունը և ոլորտային բազմազանությունը նպաստեցին քննարկումների արդյունավետությանը և գործնական գիտելիքների խորացմանը։

   Դասընթացի շրջանակում անցկացվեցին նաև լրացուցիչ թեմատիկ դասընթացներ՝ ուղղված արդի մարտահրավերներին արձագանքելու կարողությունների զարգացմանը։ Մասնավորապես, ներկայացվեցին «OSINT․ բաց աղբյուրներից տեղեկատվության հավաքագրման գործիքներ և հնարներ», «Առցանց հետաքննություններ․ կրիպտոարժույթներ և թվային վճարումներ», ինչպես նաև «Կեղծ ճամփորդական փաստաթղթերի հայտնաբերում և վերահսկողություն» թեմաները, որոնք մեծ հետաքրքրություն առաջացրին մասնակիցների շրջանում։

   Վերապատրաստման դասընթացի բացման արարողությանը ներկա էին Կրթահամալիրի պրոռեկտորներ Միսակ Մարկոսյանը և Էմիլ Մարգարյանը։ Բացման խոսքով հանդես եկավ Մ․ Մարկոսյանը՝ ընդգծելով նմանատիպ վերապատրաստումների կարևորությունն իրավապահ համակարգի շարունակական զարգացման և ժամանակակից մարտահրավերներին համարժեք արձագանքելու տեսանկյունից։ Նա նշեց, որ միգրանտների ապօրինի տեղափոխման դեմ պայքարը պահանջում է համակարգված, համադրված և միջգերատեսչական մոտեցում, ինչպես նաև միջազգային գործընկերների հետ սերտ համագործակցություն։ Իր խոսքում նա կարևորեց նաև նորագույն գիտելիքների և գործիքների կիրառումը, փորձի փոխանակումն ու միջազգային լավագույն փորձի ներդրումը՝ ոլորտում առավել արդյունավետ արդյունքներ ապահովելու համար։

   Բացման արարողությանը մասնակցում էր նաև CEPOL-ի ներկայացուցիչը, ով իր խոսքում բարձր գնահատեց ՀՀ իրավապահ կառույցների ակտիվ ներգրավվածությունն ու հետաքրքրվածությունը նման նախաձեռնությունների նկատմամբ։ Նա ընդգծեց միջազգային համագործակցության և փորձի փոխանակման կարևորությունը՝ հատկապես անդրազգային հանցավորության դեմ պայքարի համատեքստում, և ներկայացրեց CEPOL-ի կողմից առաջարկվող վերապատրաստման հնարավորությունները, որոնք միտված են մասնագիտական կարողությունների զարգացմանը և եվրոպական չափանիշներին համապատասխան հմտությունների ձևավորմանը։

   Վերապատրաստման դասընթացը հանդիսացավ կարևոր քայլ՝ ուղղված մասնակիցների կարողությունների զարգացմանը, իրավապահ համակարգի արդյունավետության բարձրացմանը և միջազգային համագործակցության ամրապնդմանը։

   Դասընթացի ավարտին մասնակիցներին շնորհվեցին հավաստագրեր՝ հաստատելով նրանց մասնակցությունն ու ձեռք բերած գիտելիքները։