Հունիսի 2-ից մեկնարկեցին ՀՀ ՆԳՆ կրթահամալիրի «Ոստիկանական գործ» մասնագիտության «Պարեկ» որակավորման հիմնական կրթական ծրագրի 6-րդ հոսքի համակարգողների և դասընթացավարների վերապատրաստման 5-օրյա դասընթացները։ Դասընթացներն անցկացվելու են երկու առանձին խմբերով։

   Առաջին խմբի վերապատրաստման դասընթացները նախատեսված են Կրթահամալիրի այն աշխատակիցների համար, ովքեր որպես համակարգողներ ներգրավված են լինելու «Պարեկ» որակավորման հիմնական կրթական ծրագրի 6-րդ հոսքի դասընթացների կազմակերպման և վերահսկողության գործընթացում։

   Երկրորդ խմբում վերապատրաստում են անցնելու «Ծառայության իրականացման մարտավարություն» և «Հատուկ ֆիզիկական պատրաստականություն» մոդուլների դասընթացավարները։

   Վերապատրաստման դասընթացներն իրականացնելու են ԱՄՆ դեսպանատան Թմրամիջոցների դեմ պայքարի և իրավապահ համագործակցության գրասենյակի աջակցությամբ, որը վարելու են ԱՄՆ արդարադատության դեպարտամենտի միջազգային քրեական հետաքննությունների վերապատրաստման աջակցության ծրագրի (ICITAP) Հայաստանի գրասենյակի ներկայացուցիչները, ովքեր ներգրավված են եղել «Պարեկ» որակավորման նախորդ 5 հոսքերի դասընթացների կազմակերպման և անցկացման գործընթացներում։ 

   Դասընթացների մեկնարկին ողջույնի խոսքով հանդես եկավ Կրթահամալիրի ռեկտորի ժամանակավոր պաշտոնակատար Մանուկ Մուրադյանը։

   Մ․ Մուրադյանն իր խոսքում նշեց, որ սույն վերապատրաստումները միտված են «Պարեկ» որակավորման հիմնական կրթական ծրագրի 6-րդ հոսքի դասընթացների նախապատրաստական և ընթացիկ աշխատանքների պատշաճ կատարմանը, ուսումնական գործընթացի հսկողությանը, դասընթացավարների հմտությունների խորացմանը, վերջիններիս մեթոդական աջակցությանը  և այլն։

   Ողջույնի խոսքով հանդես եկավ նաև ՄՔՀՎ ծրագրի հայաստանյան համակարգող Ամալյա Հովսեփյանը։ Նա նշեց, որ  ՄՔՀՎԾ-ի վերապատրաստողները նպատակ ունեն  5-օրյա վերապատրաստման դասընթացների ընթացքում իրենց՝ «Պարեկ» որակավորման կրթական ծրագրի իրականացման շրջանակներում ձեռք բերած 5 տարիների փորձը և գիտելիքը փոխանցել Կրթահամալիրի աշխատակիցներին։        Ա․ Հովսեփյանը նաև նշեց, որ 6-րդ հոսքի կազմակերպման և վերահսկողության գործընթացում Կրթահամալիրի և ՄՔՀՎԾ-ի ներկայացուցիչները կաշխատեն համատեղ, սակայն արդեն հաջորդող հոսքերի համակարգման ողջ գործընթացը կստանձնեն միայն Կրթահամալիրի՝ սույն վերապատրաստումն անցած աշխատակիցները։

   «Ծառայության իրականացման մարտավարություն» և «Հատուկ ֆիզիկական պատրաստականություն» մոդուլների դասընթացավարների համար 5-օրյա վերապատրաստման դասընթացներն անցկացնելու են ՄՔՀՎ ծրագրի հայաստանյան գրասենյակի առաքելության խորհրդական Դեյվիդ Մայքլ Լոպեսը և իրավապահ համակարգի գծով խորհրդատու Մայքլ Բեյթսը։

   Վերապատրաստման դասընթացների մեկնարկին ներկա էին նաև Կրթահամալիրի պրոռեկտորներ՝ Մ․ Մարկոսյանը, Է․ Մարգարյանը և ոստիկանական ուսումնական ստորաբաժանման պետ Գ․Գրիգորյանը։