«Կրթահամալիրի սովորողները» խորագրով նախագծի շրջանակներում այս անգամ զրուցել ենք  ՀՀ ոստիկանության կրթահամալիրի ակադեմիայի իրավագիտության ֆակուլտետի առկա անվճար ուսուցման 2-րդ կուրսի սովորող, ոստիկանության սերժանտ Անգելինա Հովհաննիսյանի հետ։

Գնացինք․․․․

-Խոսենք մանկությունից: Ինչպիսի՞ աղջնակ էիր, ի՞նչ երազանքներ ու հեքիաթներ կային մանկության տարիներին:

-Ի զարմանս բոլորի՝ չարաճճի չեմ եղել։ Փոքրուց չէի տրվում պատրանքների և չէի հավատում հեքիաթների, թեպետև սիրում էի դրանք ընթերցել։

 -Դպրոց․ նոր, ավելի հասուն կյանք: Ինչպիսի՞ն էին դպրոցական տարիները: Ի՞նչ կհիշես։ Կպատմե՞ս այդ տարիներից:

-Դպրոցական տարիներս գերակտիվ էին։ Մասնակցում էի բոլոր հնարավոր միջոցառումներին, աշակերտական խորհրդի նախագահ էի․․․դա ինձ համար այն ժամանակ հավասարազոր էր երկրի նախագահի պաշտոնին։

-Փոքրիկ իշխան. Անտուան դե Սենտ-Էկզյուպերի... Ինչպիսի՞ն է քո ստեղծած այլ մոլորակը.

-Իմ «մոլորակում» պատերազմը տեղ չունի։ Այնտեղ միայն մանուկ տարիներիս Կապանն է, ուր տիրում են սերը, համերաշխությունը և մեր չքնաղ Խուստուփը։

-Խոսեցինք Էկզյուպերիից․ առաջին ընթերցածդ գիրքը ո՞րն է եղել, ի՞նչ տպավորություն է թողել, և, առհասարակ, ի՞ նչ է գիրքը քեզ համար: 

-Առաջին ընթերցածս գիրքը Ն․Կունի «Հին Հունաստանի լեգենդներն ու առասպելները» ստեղծագործությունն էր։ Հեքիաթներից դեպի լուրջ գրականություն անցումս սահուն էր, քանզի առասպելական կերպաները որոշ չափով նույնական են հեքիաթի հերոսներին։

-Հայտնի է՝ առաջին կին ոստիկանը եղել է ամերիկուհի Էլիս Ուելսը 1910 թվականին: Նա բազում քննադատությունների է արժանացել ընտրած մասնագիտության պատճառով, բայց անխոնջ կատարել է իր ծառայությունը: Դու ինչպե ՞ս ընտրեցիր այս մասնագիտությունը:

-Մայրիկիս հորդորով։ Սակայն Կրթահամալիրում ուսումնառությունը սերմանեց սեր և հարգանք այս բարդ, բայց և, միևնույն ժամանակ, հեռանկարային մասնագիտության հանդեպ։ Կրթահամալիրում, իրավամբ, սկսում ես իրատեսորեն նայել կյանքին․․․

-Ոստիկանական համակարգն ուժային կառույց է, բայց կինը նուրբ էակ է, այս հակասություններն ինչպե՞ս ես կարգավորում:

-Կինը  թեպետև նուրբ էակ է, սակայն դա ամենևին էլ չի նշանակում, որ նա չի գտնի իր մեջ այնքան ուժ, որքան որ անհրաժեշտ է իր վրա դրված պարտականությունների կատարման համար։

- Ուսանողական տարիներ. ինչպիսի՞ն է Կրթահամալիրում ուսանողական կյանքը:

-Բազմաբովանդակ․․․ ոչ մի նոր օր նախորդին նման չի լինում մեր Կրթահալիրում։ Հենց դրանով ենք մենք յուրահատուկ։

-    Ինչպիսի՞ն պիտի լինի իրական ոստիկանի կերպարը:

-Մեր Կրթահամալիրի պետ պարոն Մուրադյանի պես։  Ես շատ կցանկանայի ապագայում լինել նրա պես պատվարժան և կիրթ։

- Ի՞նչ խորհուրդ կտաս նրանց, ովքեր ցանկանում են ոստիկան դառնալ։

-Մտածել, թե արդյո՞ք նրանք կկարողանան ըստ արժանվույն ծառայել հանուն Հայաստանի Հանրապետության և մեր հասարակության  բարօրության։

Բլից հարցեր

Պատասխանում ենք կարճ և արագ

-Երեք բառ, որով կբնորոշես ինքդ քեզ:

-Եկա, տեսա, հաղթեցի։

 -Սիրածդ աֆորիզմը:

-Ռիսկը գործի կեսն է։

-Սիրելի զբաղմունքդ:

-Ձիասպորտ։

-Խորհուրդ, որը կտայիր…

-Սիրի՛ր ինքդ քեզ։

 -Դու կին ոստիկան ես և…

-․․․և հպարտ հայուհի։

 - Իսկ վերջում․․․ (ավելացրու՛ այն, ինչ մտքովդ անցնում է այս պահին)

-Ինչ գեղեցիկ է մեր տիկին Խերանյանը։

Հարցազրույցը վարեց  ոստիկանության

 կապիտան Մարի Խերանյանը