Վերադառնալ
05.12.2022

ԵԿԵՔ ԵՐՋԱՆԻԿ ԼԻՆԵՆՔ ԽԱՂԱՂ ԵՐԿՆՔԻ ՏԱԿ…

ԵԿԵՔ ԵՐՋԱՆԻԿ ԼԻՆԵՆՔ ԽԱՂԱՂ ԵՐԿՆՔԻ ՏԱԿ…

«Կրթահամալիրի սովորողները» խորագրով նախագծի շրջանակներում այս անգամ զրուցել ենք  ՀՀ ոստիկանության կրթահամալիրի ակադեմիայի իրավագիտության ֆակուլտետի առկա անվճար ուսուցման 1-ին կուրսի սովորող, ոստիկանության կրտսեր սերժանտ Արևիկ Սարգսյանի հետ։

 

Գնացինք․․․․

 

-    Ինչպիսի՞ ն էր փոքրիկ  Արևիկը:

Փոքրիկ Արևիկը երազկոտ էր, աշխույժ ու հետաքրքրասեր:

-   Դրվագներ, որ տպավորվել են մանկության տարիներից:

-   Հիշում եմ՝ ուշ գիշերով դրսում մեր հորինած կամ արդեն հայտնի բակային խաղերն էինք խաղում: Մանկությունիցս հատկապես տպավորվել են պարային համույթով մենահամերգներն Արցախում:

-   Կպատմե՞ս դպրոցական  տարիներից:

-   Բավականին ակտիվ էի դպրոցում, մասնակցում էի բացառապես բոլոր միջոցառումներին և դրա հետ մեկտեղ  շատ լավ էի սովորում: Պետք է խոստովանեմ, որ շատ համարձակ էի: Հիշում եմ` առաջին դասարանում դասալսման եկած փոխտնօրենի հարցին, թե ինչու գրատախտակին անվանս կողքին ազգանունս ևս չեմ գրել, պատասխանեցի՝ դե որ իմանայի, կգրեի էլի:

Այդ ժամանակ դեռ տառերը չէինք անցել:

-   Ի՞նչ եք կարծում, կա՞ն վատ գրքեր։

Կարծում եմ՝ այս հարցը շատ սուբյեկտիվ մոտեցում է ակնկալում: Ես անձամբ ունեմ իմ սիրելի ժանրերը:

-   Քո ընթերցած գրքերից ո՞րն է ամենատպավորիչը։

-   Ինձ և իմ անձի զարգացման վրա շա՜տ-շա՜տ մեծ ազդեցություն է ունեցել Ռեյ Բրեդբըրիի «451° ըստ Ֆարենհայթի» գիրքը: Մեծ հույս ունեմ, որ հեղինակի  պատկերացումները չեն կատարվի, և գրքերը միշտ կուղեկցեն մարդկությանը:

 -  Խոսենք նախասիրություններից. ի՞նչն է, որ մի քանի ժամով քեզ կտրում է իրական կյանքից:

-  Դեռ մանուկ հասակից պարելիս ինձ երկնքում էի զգում և պիտի նշեմ, որ մինչև այսօր ոչինչ չի փոխվել:

-   Ինչի՞ մասին ես երազում կյանքիդ այս շրջանում:

-   Երազում եմ դառնալ ազգիս ու հայրենիքիս համար պիտանի մարդ ու մասնագետ` խաղաղ երկնքի տակ:

-  Ոստիկանական համակարգն ուժային կառույց է: Կին, ոստիկան․ այս հակասություններն ինչպե՞ս ես կարգավորում:

-  Կարծում եմ՝ «ուժային կառույց » բառակապակցությունն իրենից չի ենթադրում կնոջ բացակայություն համակարգում: Անձնական օրինակով ուզում եմ ցույց տալ, որ կինն ու ոստիկանությունը բավականին համատեղելի են:                                                                                                      

-  Ինչպե ՞ս ընտրեցիր այս մասնագիտությունը:

-  Մանկուց դրսում ոստիկան տեսնելիս ինձ ապահով էի զգում ու միշտ ցանկանում էի, որ ես էլ կրեմ ոստիկանի համազգեստն ու լավ օրինակ լինեմ հասարակությունում:

-  Ուսանողական տարիներ. ինչպիսի՞ն է Կրթահամալիրում ուսանողական կյանքը:

-   Ճիշտ է, դեռ ընդամենը 3 ամիս է, ինչ ուսանող եմ, բայց ես ապրում եմ իմ երազած ուսանողական կյանքով: Սիրում եմ Կրթահամալիրը, և այստեղ սովորելն իմ երազանքի ուղու մի մասն է:

-    Մի քանի բառով նկարագրի՛ր Կրթահամալիրի սովորողի կերպարը։

-    Կարծում եմ՝ Կրթահամալիրը Հայաստանում այն ուսումնական հաստատություններից մեկն է, որի ուսանողները պիտի լինեն շատ պատասխանատու, կարգապահ, պարտաճանաչ ու հայրենասեր:

-     Ո՞րն է ոստիկան դառնալու քո շարժառիթը:

-    Շարժառիթս իմ օրինակով ցույց տալն է, որ եթե ունես նպատակ, դրանց կարելի է հասնել ու դառնալ կիրթ և օրինակելի ոստիկան:

 -   Եթե հնարավորություն տրվեր փոխելու մասնագիտությունը, ի՞նչ կընտրեիր:

-    Անկեղծ ասած՝ մասնագիտությունս փոխել չէի ցանկանա, բայց իմ սիրելի մասնագիտություններից են նաև պարուհին ու հոգեբանը:

-    Ի՞նչ խորհուրդ կտաս նրանց, ովքեր ցանկանում են ընտրել Կրթահամալիրը։

-   Չնայած դժվարություններին՝ նրանք միանշանակ ճիշտ են վարվում: Խորհուրդ կտամ միշտ սիրով ընտրել իրենց մասնագիտությունը:

-   Թեմա, որի շուրջ անդադար կխոսես:

-   Մարդկանց ինքնազարգացման ու ինքնաճանաչողության մասին:

 

Բլից հարցեր

Պատասխանում ենք կարճ և արագ։

 

-   Երեք բառ, որով կբնորոշես ինքդ քեզ:

-   Ուրախ, երազկոտ, նպատակասլաց:

-   Միտք, որն առաջինը ծագում է արթնանալիս:

-   Եվս մի օր ունեմ երազանքիս հասնելու համար:

-   Ինչպե՞ս արդյունավետ դարձնել օրդ։

-   Ես մասամբ պլանավորում եմ օրս և փորձում եմ չխախտել այն: Շուտ եմ արթնանում, պահպանում եմ հանգստիս ռեժիմն ու բալանսավորված սնունդը:

-   Օրն սկսում ես ժամը…

-   Օրս սկսում եմ 06:00-ին:

-   Սիրածդ աֆորիզմը:

Խնդիրը խնդրի մեջ չէ: Խնդիրը նրա մեջ է, թե դու ինչպես ես վերաբերվում այդ խնդրին:(Ջոնի Դեփ)

-   Սիրելի զբաղմունքդ:

-   Սիրում եմ պարել, երաժշտություն լսել ու ընթերցել:

-   Խորհուրդ, որը կտայիր։

-   Որևէ դժվարության առաջ չընկրկել:

-   Իսկ վերջում․․ (ավելացրու՛ այն, ինչ մտքովդ անցնում է այս պահին)

-   Եկեք երջանիկ լինենք խաղաղ երկնքի տակ…

 

Հարցազրույցը վարեց

ոստիկանության կապիտան

 Մ. Խերանյանը