Մայիսի 15-18-ը ՀՀ ՆԳՆ ոստիկանության կրթահամալիրում տեղի ունեցավ «Զանգվածային միջոցառումների ժամանակ հասարակական կարգի պահպանում» թեմայով վերապատրաստման դասընթաց` հայ-ֆրանսիական ոստիկանության համագործակցության 2023թ․ ծրագրի շրջանակներում:  ՀՀ ՆԳՆ տարբեր ստորաբաժանումների ծառայողների հետ իրենց փորձն էին եկել կիսելու Ֆրանսիայի ոստիկանության ազգային անվտանգության մարմնի (C.R.S) փորձագետներ Քվենտին Վինոտը և Նիկոլա Լուվիեն:

Դասընթացի մեկնարկին ՀՀ ՆԳՆ ոստիկանության կրթահամալիրի պետ, ոստիկանության գնդապետ Մանուկ Մուրադյանը ողջունեց հյուրերին ու մասնակիցներին՝ նշելով, որ Կրթահամալիրը հետևողականորեն կազմակերպում ու նախաձեռնում է նմանատիպ միջոցառումներ՝ նպաստելու ծառայողների գիտելիքների, գործնական հմտությունների բարելավմանը:

Քառօրյա դասընթացը հագեցած էր զանգվածային հավաքների ժամանակ  ֆրանսիական ոստիկանության ձեռնարկած մարտավարական գիտելիքներով ու հմտություններով,  Հայաստանի և Ֆրանսիայի համապատասխան ստորաբաժանումների առանձնահատկությունների համեմատական վերլուծությամբ, գործնական վարժություններով ու ակտիվ քննարկումներով: Գործնական վարժություններից մեկին ակտիվ մասնակցություն ունեցան նաև Կրթահամալիրի սովորողները։

Դասընթացն ամփոփվեց Կրթահամալիրի պետի շնորհակալական խոսքով՝ ֆրանսիական փորձը ՆԳՆ ծառայողներին  արդյունավետ փոխանցելու համար։

Ֆրանսիական փորձը յուրացնելու կապակցութամբ մասնակիցներն ստացան համապատասխան հավաստագրեր։