Հայաստանի Հանրապետության և Բելգիայի Թագավորության ներքին գործերի նախարարների հանդիպման ընթացքում ձեռք բերված պայմանավորվածության շրջանակներում ս․թ․ հունվարի 20-ին ՀՀ ՆԳՆ կրթահամալիրում անցկացվեց մեկօրյա դասընթաց՝ «Հատուկ պետական պաշտպանության ենթակա անձանց ուղեկցում՝ նրանց մասնակցությամբ իրականացվող միջոցառումների ընթացքում» թեմայով։

   Դասընթացը վարեցին Բելգիայի Թագավորության դաշնային ոստիկանության փորձագետներ Ջիլ Լիբերլուն և Քրիստոֆ Թոնուսը։  Օրակարգում Բրյուսելում Եվրոպական Միության գագաթնաժողովի ոստիկանական կառավարման փորձի ներկայացումն էր։  Դասընթացին մասնակցեցին ՀՀ ՆԳՆ ոստիկանության գվարդիայի և պարեկային ծառայության 15 ծառայող, ինչպես նաև Կրթահամալիրի 2 դասախոս։

   Ներկաներին ողջունեց Կրթահամալիրի ռեկտոր Մ․ Մուրադյանը՝ ընդգծելով միջոցառման կարևորությունը, և վստահություն հայտնեց, որ այն կընթանա արդյունավետ ու բովանդակային քննարկումների մթնոլորտում։

   Փորձագետների փոխանցմամբ՝ ԵՄ գագաթնաժողովների մասնակիցների ուղեկցումը ենթադրում է մի շարք ընթացակարգեր, որոնք նպատակ ունեն ապահովել բարձրաստիճան հյուրերի, հանրության, ճանապարհների անվտանգությունը և ապահովել երթևեկության անխափան հոսքը։

   Դասընթացի մասնակիցները հարցեր ուղղելու և յուրաքանչյուր գործողության վերաբերյալ մանրամասն պարզաբանում ստանալու հնարավորություն ունեցան, միաժամանակ  ներկայացվեց ավտոշարասյունների ուղեկցման  հայկական փորձը։